بوگون منه بیر كرمی چال آشیق
قان آغلاسین اورگیمده ، دیده مده
سنده باخیب هر دردیمی بیل آشیق
بوگون منه بیر كرمی چال آشیق
******
چال یاییلسین بو غم، غصه هر دیله
تك بیر اورك دوزمز بئله نیسگیله
درد بویوك دیر بم چیخارتماز ، چك زیله
قیریلماسین سازینداكی تئل آشیق
بوگون منه بیر كرمی چال آشیق
******
من كی سنده آرامیرام یاراشیق
بیلدییینی اسیرگمه چال آشیق
كونلوم كیمی دونیام گلیب قاریشیق
وارلیغیما اسیر یامان یئل آشیق
بوگون منه بیر كرمی چال آشیق
******
بو گون یامان ایتیرمیشم اوزومو
تاپانمیرام آغزیمداكی سوزومو
اللریمده گیزلتمیشم اوزومو
سان كی باتیر گوزلریمه میل آشیق
بوگون منه بیر كرمی چال آشیق
******
گوزوم باخا باخا قلبیم اولدو قان
اسیر اولدو ائرمنییه موسلمان
تالاندی جبراییل ، یاندی زنگیلان
دونیانین آغزیندا سوسدو دیل آشیق
بوگون منه بیر كرمی چال آشیق
******
توپ،تانکیلا هر طرفی اویدولار
ائل اوبانی یامان گونه قویدولار
وارین یوخون الدن اله سویدولار
كیمسه ده قالمادی دؤولت ، مال آشیق
بوگون منه بیر كرمی چال آشیق
******
اورییمی یامان آلیب سكسكه
وارلیغیما گؤلگه سالیب تهلی كه
خبر گؤندر كوراوغلویا ، بابكه
یامان یئرده تورا دوشوب ائل آشیق
بوگون منه بیر كرمی چال آشیق
******
بیرده بو دهشتی گؤرمه سین گؤرن
كؤنلومه غم چؤكدو ، گؤزلریمه چن
اؤنو آراز كسدی ، آرخانی دوشمن
نه لر اولدو دیلیم اولسون لال آشیق
بوگون منه بیر كرمی چال آشیق
******
سؤیله خان چوپانا ساخلا ال بیر آز
داها بوندان سونرا آز سارادان یاز
مینلرله سارامی آپاردی آراز
هاممیسی گول یاناق ، اینجه بئل آشیق
بوگون منه بیر كرمی چال آشیق
******
آمان آشیق آستا دانیش بیلن وار
جبراییلدان،زنگیلاندان گلن وار
بوردا اوغلو، بوردا قیزی اؤلن وار
غم پرده سین، غم اوستونه سال آشیق
بوگون منه بیر كرمی چال آشیق
******
یانان كؤرپه لرین آهی، ناله سی
قاچان آنالارین بالا وای سسی
موردار دیغالارین اودلو گولّه سی
صحنه یه وئرمیشدی باشقا حال آشیق
بوگون منه بیر كرمی چال آشیق
******
سؤیله شمشیر اویان اولدو گؤر نلر
گؤر نه گونه قالدی یوردون كلبجر
روحون مندن اینجیمه سین علسگر
گلنمه دیم اوزاق دوشدو یول آشیق
بوگون منه بیر كرمی چال آشیق
******
اینانمیرام ساغلیغیما چارام وار
شوشام كیمی داغیلمامیش هارام وار
گؤیجه آدلی بیر ساغالماز یارام وار
تزه له نیر دولاندیقجا ایل آشیق
بوگون منه بیر كرمی چال آشیق
س . گل محمدی
هیچ نظری موجود نیست:
ارسال یک نظر